انا والليل والعبرة وجرح وخاطرٍ مكسور
ونفس من هجير البعد والحرمان مقهورة

وقلبٍ ظامي لشوفك ولا يروي ظماه بحور
وعينٍ تحتري لحظة غياب الطيف وحظوره

ونارٍ تنطفي مره ومره تشتعل وتثور
واقول النار مقدوره وهي ما هيب مقدورة

حسبت الليل بغيابك يمرن الليال دهور
وكني شايل بقلبي ليال الوقت وشهوره

تصبرت وتقدرت وبنيت من الخيال قصور
إلين ان الجفا شد الركايب وانتهى دوره

تحريتك على درب القصيد من ثلاث شهور
وحشا ما مات لك غصن يشف الماي بجذوره

تخيرت الغرام وجيت لا راضي ولا مجبور
وجيتي تسبقين خطاك مرضيه ومجبوره

وانا ما كان لي رغبه أبين واكشف المستور
ولكن الجمال أكبر من الخفاق وشعوره

جمال وود وعيون ودلال وكبرياء شعور
وفتنه تخذل عيون النهار وينطفي نوره

ولك في خافقي صوره تلاشت بين ضي ونور
اخاف اسكت من الفرحه وتنطق بإسمك الصورة

عرفتك وانتهت رحلة قساوة دربي المهجور
والا يا جملة ايام الجفا والصد مشكورة

خذتني للجفا عزه واخذني للعناد غرور
واخاف اكون بعنادي حبيب ومات بغروره

واذا كانت مسافات الخيانه للغرام قبور
وش اللي يجبر العاشق يخون ويحفر قبوره؟

وش اللي يجبر الشاعر يدور للشعر جمهور؟
مدام انتي محبينه وعشاقه وجمهوره